UNHA TROPA DE DESFRUTONES DESPIDEN O SEU PRIMEIRO ANO NO COLE!

Parece que foi onte cando 15 valentes nenos e nenas chegaron ao cole de Seixo cargados de nervios, e con moita ilusión, pero xa pasaron 9 meses e acaban de despedir o seu primeiro ano no cole cheos de enerxía e alegría: que tropa de desfrutones!!!

Cantas cousas especiais pasaron este mes! Ademais do traballo do día a día fixemos moitas cousas diferentes: temos moito que contar! A primeira semana, do 5 ao 9 de xuño, pasou algo moi especial: "medrou" herba no soportal!! Alucinamos un montón e desfrutamos dela dende o primeiro momento. A verdade é que todo o noso patio é un auténtico tesouro e nel vivimos moitas aventuras!!!

Pero, sen dúbida, o máis especial desa semana foi a excursión de fin de curso. Aínda que a chuvia nos fixo dubidar, puidemos aproveitar o día a tope: acuario, barco, illa.... un diazo!!! Aquí tendes un super vídeo cargado de recordos dun día inesquecible.

Na semana do 12 ao 16 puxémonos a tope a rematar as cousas da exposición. Despois de ver os peixes no Acuario, xa estábamos listos para facer os nosos peixes ao estilo de Luca Paroli: traballamos un montón e fixemos auténticas obras de arte! Esa semana tamén celebramos o día da bicicleta: un transporte 100% RqueR! (Podedes ver máis do dia da bicicleta premendo AQUÍ)

Despedimos esa semana celebrando que Ariani, Roi e Gala teñen 3 anos, e antes de comezar o próximo curso cumprirán 4. Fixemos unha festa con eles e démoslle o agasallo especial coas nosas pegadas: canto nos gustan as festas!!!

A última semana, do 19 ao 21, foron tres días cargados de actividades especiais: xogamos as finais das competicións deportivas, participamos nunha masterclass de zumba, fixemos unha despedida especial (con graduacións, merenda conxunta....). O mellor é que pasedes polo blog de Arnaldo (podedes facelo premendo no nome de cada unha das actividades). A maiores, aquí tendes algunhas imaxes nosas deses días.

A última semana celebramos que antes de rematar o mes, Eira e Dylan cumprirán 4 anos, e tamén celebramos os 3 de Saúl. Desfrutamos dunha merenda especial e dun bailoteo que tanto nos gusta.

A exposición final foi un auténtico éxito, chea de traballos incribles que podedes ver premendo AQUÍ. Todo o alumnado e o profesorado fixemos un gran esforzo para demostrar que reciclando, reutilizando.... e con todas as ERRES pódese facer arte de categoría!! Neste pequeno vídeo podedes ver o que fixemos na nosa clase: un cadro feito de cartóns vellos, os peixes ao estilo Luca Paroli e a Xacia Luviñas que nos ensinou moitas cousas.

Así versionamos o conto da Xacia Luviñas, un conto de Anxo Moure co que aprendemos como podemos coidar a natureza e tamén ás persoas que nos rodean: somos uns actorazos!!!

Oxalá este curso deixe en cada peque unha pegada tan grande coma na mestra!!!

O ano que ven máis e mellor!!

E CASE SEN DARNOS CONTA... MAIO VOOU!!

O mes de maio na clase de 3 anos foi do máis completo, e é que este mes no cole foi moooi intenso!! Xa vos contamos que tivemos moitos aniversarios este mes (podedes velos premendo AQUÍ)

A primeira semana do mes foi moi cortiña, de so 3 días, pero non paramos. Fixemos moitas artistadas, incluso en inglés coa teacher, coa que reciclamos unhas botellas de plástico para facer unha cousa chulísima que é un segredo. Ademais, á nosa planta Pepita chegoulle unha amiga á que chamamos Juanita: están as dúas preciosas!! Rematamos esta semana cun consello de nenos no que Andrea, Mael e Dylan, nos representaron de marabilla!

A semana do 8 ao 12 de maio estivo chea de artistadas de primavera e de picnics no patio. Fixemos un paseo ata o río a buscar auga, para unha charquiña de cágados que fixeron os compis da clase da profe Jeni. Tamén comezamos unha sorpresa para o día da familia. E todo isto sen deixar de traballar cos números, coas letras, coa música... e tamén co corpo, que ata podedes ver un pouquiño do moito que traballamos na clase de psicomotricidade. 

Este vídeo é un pouco máis longo, pero e que a semana do 15 ao 19 foi moi especial. Rematamos as sorpresas para as nosas familias, que son as mellores do mundo! Desfrutamos de contadas chulísimas, que prepararon compis de outras clases; investigamos a Don Paco, o protagonista do día das letras galegas e rematamos a semana cunha visita moi especial: puidemos tocar a serea do coche da poli!! No vídeo podedes ver como cada día somos máis autónomos traballando e cada día aprendemos máis!

A semana do 22 ao 26 de maio rematámola coa festa do galego, na que todo o cole fixemos unha andaina ata A Pradeira, que rematou cun super concerto (xa vos ensinaremos no blog de Arnaldo o ben que o pasamos!).

Foi unha semana na que traballamos un montón e seguimos experimentando con novos materiais, coma o barro, que nos encanta, e descubrimos que tamén serve para pintar! As letras dos nosos nomes son as que máis nos motivan, cada día controlámolas máis e facemos moitos xogos con elas.

Ademais das diferentes propostas que temos cada día, esta semana fixemos moitas artistadas, porque imos preparado cousiñas para final de curso, e tamén fixemos un super cadro con arte RqueR porque os super erres aproveitan todo, e nós, neste cadro, pegamos moitas cousas de cartón que xuntamos durante o curso e despois pintámolo líbremente: encantounos!!! Fixémolo moi concentrados e relaxados... e moi cantarines!! Rematámolo para celebrar o día do medio ambiente.

 

MAIO CARGADIÑO DE ANIVERSARIOS

Na clase dos peques, pouco a pouco, todos van cumprindo 4 anos. No que levamos de mes xa celebramos que tres compis estiveron de aniversario: que mes tan completo!!!

E como os días importantes hai que celebralos e compartilos cos compis, iso facemos, e pasámolo pipa festexando que Xavi, Theo e Artai xa teñen 4 anos!!!

O MES DE ABRIL DOS PEQUES DO COLE

A semana do 11 ao 14 de abril volvemos ao cole, despois das vacacións de semana santa, e fixémolo coas pilas cargadas e con moitas ganas de seguir aprendendo. Entre outras cousas, seguimos xogando cos nosos nomes, de diferentes formas que nos divirten e nos motivan. Introducimos un xogo con pinzas da roupa: que difícil pero canto nos axuda a traballar a forza e a precisión cos nosos dediños. Tamén aprendemos a xogar ao bingo que fortalece a nosa atención e é moi divertido!!

A semana do 17 ao 21 foi a semana do libro e descubrimos moitos contos cos que contamos, cantamos, xogamos, dramatizamos: encántannos as historias!! Ademais de todo o traballo e actividades da aula fixemos dúas, moi especiais, con todos os compis do cole: "Nova vida aos libros" e o "Apadriñamento lector" (podedes ver máis no blog de Arnaldo premendo AQUÍ)

Na última semana do mes, do 24 ao 28, dedicamos moito tempo a facer traballos artísticos xogando cos números, coas cores, coas letras, coa primavera... calquera escusa é boa para manchar as mans de pintura! Algo que nos fixo desfrutar moito foi descubrir o barro e comezar a experimentar con el: encantounos!! Despedimos a semana cunha actividade moi especial que compartimos con todos os compis do cole: BASURALEZA! Entre todos limpamos carballeiras e roteiros cercanos ao cole: Super Erres en acción!! (podedes ver máis de Basuraleza no blog de Arnaldo premendo AQUÍ)

Este mes Alicia deu a súa 4ª volta ao sol e celebrámolo con ela: encántannos as festas! Parabéns Alicia!

E tamén Paula estivo de aniversario e celebramos con ela que xa ten 4 anos: parabéns Paula!

OS MÁIS PEQUES DESPIDEN O TRIMESTRE

Os máis peques do cole despedimos o mes de marzo cun montón de actividades e días especiais. A semana do 20 ao 24 de marzo démoslle a benvida á primavera facendo uns ramos e uns cadros chulísimos. Esa semana tamén tivemos unha actividade especial cuns investigadores do Instituto de Investigacións Mariñas de Vigo, un deles era o papá de Olivia, de 1º, graciñas por contarnos tantas cousas interesantes! Alucinamos un montón vendo incluso animais vivos! 

A última semana do mes, do 27 ao 31 de marzo, fixemos moitiiiiisimas cousas. Como súper erres que somos, fixemos ramos de flores reciclando cartóns de ovos e puxémoslles pauciños que saímos a coller á carballeira que está ao lado do cole. Tamén reciclamos vasiños de iogur que decoramos e usamos para plantar amorodos coa axuda da profe Fátima: que divertido!!! Fixemos unha andaina, con todos os compis de infantil, ao parque da Brea onde fixemos un picnic. Ademais seguimos aprendendo cos xogos de mesa, desfrutando moito no patio... e despedimos marzo bucando ovos de pascua e comendo rosca: pedazo mes!!!

Non podemos despedir o mes sen felicitar a Xoel co que celebramos que xa ten 4 anos: parabéns Xoel!!!

OS MÁIS PEQUES DESPÍDENSE DO INVERNO

Os máis peques do cole despedimos febreiro e recibimos marzo con moita enerxía e con ganas de primavera. Entre outras cousas, na semana do 27 febreiro ao 2 de marzo estreamos un xogo moi divertido con fotos das nosas caras: coñecémonos de marabilla!!! 

Na semana do 6 ao 10 de marzo fixemos neve para empezar a despedida do inverno, que estaba a piques de rematar. Esa semana tamén pasamos tempo presumindo de avoas, ás que dedicamos o día da muller, porque todas as avoas son unas super avoas!

 

Chegamos á metade de marzo e seguimos desfrutando cos traballos plásticos, xogando cos números e coas letras, que cada día nos chaman máis a atención, e traballando día a día con máis precisión.

Chegou o último aniversario do inverno e tivemos un día de festa para celebrar que Andrea xa ten 4 anos: parabéns Andrea!

O FEBREIRO DOS SUPER R

Os máis peques do cole vivimos a tope o noso primeiro entroido no cole. Na semana do 6 ao 10 de febreiro seguimos facendo actividades relacionadas co inverno, pero xa nos puxemos en marcha cos disfraces: traballamos un montón!! 

A semana 13 ao 17 de febreiro desfrutamos a tope do entroido. Rematamos os disfraces: esforzámonos un montón e traballamos con moita ilusión. Foi unha semana moi divertida, o mandadiño fixo que cada día fose diferente, sempre desexando ver os complementos do día. E por suposto xogamos con disfraces... encántanos!!! Se queredes ver máis do desfile do entroido de todo o cole, podedes velo premendo AQUÍ. Este vídeo resume a nosa semana, que foi xenial!

Despois das vacacións de entroido tivemos unha semana moi cortiña pero aproveitada a tope. Os días 23 e 24 de febreiro celebramos o día de Rosalía e axudamos na construción da cabana de vimbio. Podedes ver a todo o cole facendo a cabana se premedes AQUÍ. 

Escoitade con atención o vídeo resumen da semana, que no son de fondo hai unha sorpresa! 

DESPEDIMOS XANEIRO CORRENDO POLA PAZ

Os peques do cole despedimos o primeiro mes do ano facendo, con todos os compis do cole, a carreira solidaria, foi un mes de xaneiro chulísimo! Na semana do 23 ao 27 fixemos moitísimas cousas. Entre elas rematamos o noso mural de autorretratos: quedou precioso! Tamén puxemos en marcha a "Brigada recicladora" porque cada día temos máis claro como separar o lixo e nós mesmos o levamos aos contedores correspondentes ou ao composteiro. Ademais rematamos de facer os dorsais para a carreira solidaria: fixémolos con moito esforzo e coidado, por iso nos quedaron tan chulísimos.

A semana do 30 de xaneiro ao 3 de febreiro comezou coa celebración da "IV Carreira solidaria: corre con Arnaldo" da que podedes ver máis premendo AQUI. E con ese comezo de semana o resto foi rodado. Seguimos aprendendo cousas do inverno e facendo arte coas súas cores: canto nos gusta artistear!

COMEZAMOS XANEIRO COAS PILAS CARGADAS!

Os máis peques do cole comezamos o ano cargados de enerxía e con moitas ganas. Chegamos e atopamos a árbore de Nadal chea de agasallos para a nosa aula: que emoción abrir paquetes e estrear tantas cousas! Ademais, a chuvia permitiunos desfrutar algún recreo no patio, que xa o botábamos de menos!

 

A segunda semana de xaneiro seguimos con moita enerxía xogando e traballando cos números e coas letras, sobre todo coas dos nosos nomes. Imos descubrindo que hai moitas formas diferentes de escribir, non so co lapis, e é moi divertido facelo: en pan raiado, no papel máxico....

Tamén comezamos un cadro xigante que estamos facendo entre todos: somos uns artistazos!

Algo moi especial que celebramos o día 17 foi o aniversario de Iago, que é o primeiro en cumprir 4 anos, e festexamos con el a súa cuarta volta ao sol.

 

O MES DO NADAL NA CLASE DE 3 ANOS

O último mes do ano está cheo de maxia e ilusión, e sendo o primeiro decembro que pasa no cole a tropa de 3 anos, non podía ser menos.

A primeira semana do mes tivo moitos días festivos pero aproveitámola requeteben: recibimos visitas de Pupi cheas de sorpresas, fixemos moitas artistadas de Nadal, decoramos, fixemos galletas, fomos ao cine, compartimos moitos xogos...

 

 

A seguinte semana Pupi seguiu sorprendéndonos coas súas gamberradas e planes divertidos, ademais seguimos facendo decoración de Nadal e compartindo xogos e aprendizaxes. A actividade máis especial desa semana foron as postais de Nadal: eliximos a quen lla queríamos enviar, fixemos as postais, dedicámolas, metémolas no sobre e puxémoslle os selos: traballamos un montón! E por suposto saímos ata correos para envialas: que emoción!!

 

 

 

E a última semana despedimos o Nadal como merece: con risas, bailes, doces... e compartindo cos compis! Fixemos ensaios co profe Tano para o festival, ensinámoslles aos compis as árbores de Nadal que temos na casa, viaxamos no tren do Nadal, compartimos unha merenda especial cos compis de infantil, tomamos a chocolatada da ANPA, tivemos o festival, visitounos mamá Noel....

 

 

Despedimos 2022 recordando que ser diferentes.... mola! 

O ano que ven: máis e mellor!!!

ADEUS NOVEMBRO!

Os máis peques do cole despiden novembro con moita enerxía e felices polo ben que o aproveitaron e o moito que aprenderon con todos os compis.

Seguimos gañando autonomía e seguridade no día a día, xogando e aprendendo coas letras, cos números, coas formas, coas cores... traballando moito coas mans para gañar forza e destreza... correndo, saltando... cantando, bailando, pintando e creando, investigando... por suposto, sempre xogando, que é como mellor se aprende.

Así foi a semana do 14 ao 18 de novembro... que gustazo cando a chuvia nos da tregua para aproveitar o patio ao máximo!

 

Do 21 ao 25 de novembro, ademais de seguir traballando na aula cos compis, dedicamos momentos especiais a preparar o 25N con contos, obras de arte e outras dinámicas para entender e berrar ben forte: STOP VIOLENCIA! porque o que nos gusta é o bo trato!

  

Do 28 de novembro ao 2 de decembro, entre outras cousas, celebramos o mes da ciencia facendo un experimento na aula de arte: atopamos un tesouro!

  

Xa comezamos decembro e estamos desexando desfrutar este mes tan especial cheo de maxia... e Pupi vaino desfrutar con nós!!

OS PEQUES COMEZAMOS NOVEMBRO CON MOITAS GANAS!

Comezamos novembro cun festivo e unha semana moi cortiña pero aproveitada ao máximo. 

Seguimos xogando cos nosos nomes, cos números, coas formas, as cores... seguimos artisteando, construíndo... non paramos! 

Así resumimos a semana do 2 ao 4 de novembro que rematou cunha visita mooooi especial.

  

E así foi a semana do 7 ao 11 de novembro, a semana do magosto, na que fixemos moitas cousas especiais (se queredes ver o ben que o pasamos no magosto premede AQUÍ)

OS PEQUES DESPIDEN OUTUBRO CON MOITAS ACTIVIDADES

Os máis peques do cole despediron outubro compartindo o samaín con todos os compis do cole, e que ben o pasaron!

Unha das cousas que máis lles gusta é poñer o mandilón para facer artistadas: coller os pinceis e pintar... no papel, nas mans ou onde faga falta!

Despedimos o mes con moita chuvia pero tamén aproveitando todos os momentos que puidemos no patio, e tamén despedimos outubro co aniversario de Mael que deu unha volta máis ao sol: agora todos e todas temos 3 aniños!!

Unha das actividades de Samaín que puidemos recuperar, foi "Polo samaín cóntame a min", o cal nos permitiu desfrutar, outra vez, das contadas das familias. Graciñas ás mamás de Eira, Xavi e Mael que viñeron a contarnos contos e tamén a Noa e Clara, primas de Xavi, que tamén compartiron unha historia cos peques.

 

OUTUBRO DA PARA MOITO!

Recibimos o outono por todo o alto e con moitas ganas de aproveitar o tempo no cole.

A semana do 17 ao 21 de outubro estivo chea de contos: contos pola igualdade, empezamos con contos terroríficos coa profe Jeni... e inauguramos a biblio con Anxo Moure e noso primeiro contacontos no cole.

Ademais, as mochilas viaxeiras están en marcha: pasarémolo pipa con elas!! 

SUPERADO O PRIMEIRO MES NO COLE

Despois dun mes no cole, os máis peques van facendo piña e cada día van collendo máis confianza, por iso comezan moitos días con apertas de bos días. E aínda que levan pouquiño no cole xa se animaron a facer a súa primeira andaina con todos os compis de infantil, e fixérono xenial!!

 

A TROPA DOS PEQUES SEGUE PASIÑO A PASIÑO

Sen presa, pero sen pausa, seguimos avanzando cara adiante, buscando estar cada día máis a gusto, para aproveitar a tope o tempo que pasamos no cole. Cada día coñecémonos máis e imos facendo grupo, que tamén nos axuda a estar máis cómodos. Incluso aproveitamos para facer pícnic, que facer iso en Galicia en outubro é todo un luxo!

DESPEDIMOS SETEMBRO NA CLASE DE 3 ANOS

E así despedimos o mes no que nos estrenamos no cole de maiores: facendo unha pulseira máxica, a pulseira dos bicos. 

Esta semana traballamos un montón e xogamos aínda máis. Pouco a pouco imos descubrindo todos os recunchos do cole e sentímonos máis comodos.

 

Aquí vos deixamos un vídeo que resume parte do que fixemos estes días. O máis importante é que seguimos gañando confianza para, día a día, estar máis a gusto desfrutando do cole e de todas as cousas chulas que facemos aquí.

 

PRIMEIRA SEMANA NO COLE DE MAIORES

As nenas e nenos da clase de 3 anos superaron a súa primeira semana completa no cole, e fixérono con nota!! Ademais recibiron xuntos o outono xogando coas follas.

 

Pouco a pouco imos coñecendo máis ao profesorado, aos compis, os espazos... e iso axuda a sentirnos máis comodos no cole. Aquí tendes un resumo desta semana na que xogamos no patio de maiores, descubrimos outros espazos como a aula de luz... e moitas cousas máis!

.

RECIBIMOS UNHA TROPA MARABILLOSA EN SEIXO!

Estes sorrisos taaaan bonitos levan unha semana iluminando o cole de Seixo. A clase de 3 anos está formada por 15 pequechas e pequechos que xa remataron o seu período de acollida e o luns comezarán con horario completo.

 

Día a día fomos coñecéndonos e gañando confianza, para explorar e desfrutar todas as cousas que podemos facer na aula, no patio... en todo o cole! Xogamos mooooito cos compis e fixemos moitas cousas. Pouco a pouco, sentímonos cada día un pouquiño máis a gusto.

E por fin saímos ao marabilloso patio do cole de maiores que tantas veces vimos dende fora, e que ben o pasamos... incluso recolectamos e comemos tomates e fresas!!

Paula, Gala, Dylan, Xabi, Artai, Saúl, Eira, Roi, Ariani, Mael, Iago, Cristina, Theo, Xoel e Andrea: estamos desexando compartir mooooitas aventuras xuntos no cole!